walahy ba7eb 2el 7okoma ya basha............

NOTE : 2el post dah beta3 shady bardo .... mesh beta3y ....... howa mewasene 2a2oloko keda....
posted by : shady naguib ..... not yassien

hiii , i am shady : ya gama3a ana men 2ashd 2lmo3gaben bel7ekomo w ana 2egabe geedan.w 2lmawdo3 da man2ol mn ketab 2esmo 7adath fe 2anteka..le 2lkateb ... mesh faker bas hwa kan kateb 7elww 2anteka de dbalaad tanya 3'er masr...w da hezaaaar w ma7adsh yefham 3'alat

استقاله وزير
مكتب وزير الثقافه


كان وزير ثقافه انتيكا جالس فى مكتبه ، يقرأ الجريده حين استوقفه خبر غريب ...

استقالة وزير المواصلات اليابانى

فاستدعى مدير مكتبه على الفور:
-- ( حسين) .. تعالى..قريت الخبر ده؟
-- قريته يا فندم ..ماله؟
-- ايه الاستقاله دى ؟؟
-- و الله يا فندم علمى علمك!
-- يبقى تدور لنا عليها عشان لو حاجه حلوة نعملها..اشمعنى اليابانيين يعنى ! .. عندك فكره فى وزير هنا فى انتيكا عمل البتاعه دى قبل كده؟؟
-- لا يا فندم اول مره اسمع عنها.
-- طيب اتصل باليابان كده و استفسر

**********
.. بعد يومين

حسين يدخل لى الوزير متهللا:
-- لسه قافل مع اليابان دلوقتى..
-- ها..قالولك ايه؟؟؟
-- هما قالوا كلام كتير قوى.. بس انا مافهمتش حاجه.. ما انت عارف انى مش بكلم يابانى.!
-- امال جاى مبسوط أوى كده ليه يا حيوان؟
-- ما انا يا فندم عندى رأى..
-- قول..
-- انا بارجح ممكن الاستقاله دى تكون مثلا ترقيه للوزير
-- ترقيه!! .. والله كلام معقول.
-- و مادام ترقيه يبقى اللى بيرقى هو حاكم الدوله...
-- يبقى نقدم الوليه اللى اسمها استقاله دى من بكره.
-- بس هو ممكن مايوافقش .. عشان البتاعه دى جديده.
-- لا ماعتقدش..احنا لسه واقفين معاه واقفه جدعان فى الانتخابات ............. ...... بس باقولك ايه.. اوعى حد من الوزراء الرمامه اللى فى المجلس ياخد خبر.. عاوز اكون اول واحد.
.. قصر حاكم انتيكا
تناول الحاكم دواء الضغط ، ثم يقول لكبير الياوران:
-- وبعدين بقى فى حركه هوينا دى .. مش يتلموا شويه بدل ما اسود عشتهم..
-- ما هى سودا اساسا يا فندم
-- بتقول حاجه؟
-- قصدى ما هما متحامين فى جمعيه حقوق الانسان

ثم ابتلع دواء السكر ، واردف:
-- حقوق يه بس ..هما مش بياكلوا فول كل يوم وعايشين؟؟.. اعملهم ايه تانى؟!!
-- هما بياطلبوا بحاجات كمان غير الفول.
ثم يتناول دواء منظم ضربات القلب ، و يتابع:
-- خلاص..نزلو لهم الطعميه خليهم يعيشوا عيشه ملوك.. بس بالسعر السياحى .. اه.. اجيب منيين؟؟
-- لا يافندم هما بيطالبوا بحاجه كده .. اسمها..( يخرج ورقه من جيبه) .. اسمها ديموقراطيه.
يستنشق موسع الشعب الهوائيه و يقول: -- مين؟؟ دينوق...الله يخرب بيت الدش اللى بوظ اخلاق الناس ..طيب .. شوفوا لهم الهبابه دى و ابقا هاتلنا منها شويه ..بس برده بالسعر السياحى.. هانجيب منيييين؟
-- حاضر يافندم ...... فيه طلب غريب من وزير الثقافه.
يتناول مذيب الجلطه صارخا:
-- خير.. عايز ايه هو كمان؟؟.. لو عايز دعم مفيش اجيب منييييين
-- لا دا عايز حاجه غريبه قوى اسمها.. اس..اس...
-- اسلاموا عليكوا..انت هاتغنى؟!..انا مش فاضى ..( حلقه كابتن ماجد) قربت تيجى.. اخلص.
-- استقاله
-- ده يوم ايه المهبب ده؟! ..ديموقراطيه و اصطباحه.. قصدى استقاله.. انا اصطبحت بوش مين النهارده!.. انا قلت البلد دى ماينفعهاش دش..تطلع ايه الاستقاله دى؟؟
-- والله يا جناب الحاكم مش عارف..انما نسأل.....اى اوامر تانيه؟
يجلس على الكرسى المتحرك
-- شغل الدش على(سبيس تون) وغور فى داهيه.

..وزاره الداخليه

مساعد الوزير يهمس فى اذنه:


-- مقدم طلب للحاكم عشان يوافق له على الاستقاله ، و مين عارف ايه البتاعه دى...جايز تخليه يمسك الداخليه كمان .

-- يا نهار ابوه اسود.. لاه ده بوعده ، اتصل اسأل ايه الاستقاله دى...معاك رنات ؟

-- لا سعدتك انا فى السماح
-- طب خد موبايلى
-- احم..ماهو مسروق يافندم و لسا مالاقيناهوش
-- و الحل؟..
-- فى حل واحد ... اتغدى بيه قبل ما يعشى بيك ، وقدم انت كمان على استقاله.
-- و الله فكره.

*********
..قصر الحاكم

الحاكم يتمايل طربا على انغام احدى الاغنيات و يردد معها ( انا كده انا كده..دلوعه دايما ) حين يدخل كبير الياوران فيبادره:
-- سألت لنا على الاستقاله ؟؟
-- ماحدش فاهم حاجه خالص يا جناب الحاكم .... مافيش حد فى الدول العربيه و الافريقيه يعرف عنها حاجه .. حتى فى كل القواميس السياسيه العربيه مالهاش اثر.!
-- امال الجدع ده جابها منين ؟؟
-- انا سمعت طشاش كده ، ان فى بلاد بره الرئيس بيوافق بس لما يكون عمل حاجه كبيره.
-- كبيره ايه ؟؟... دول بهايم هو حد بيعمل حاجه من نفسه؟؟... كله بتوجيهاتى.. طب و العمل يا حيوان؟
-- انا رأيى سعادتك نرفض وخلاص ، و الباب اللى يجيلك منه الريح سده و استريح . ، لو طلعت حاجه كويسه مش بعيد تلاقى كل الوزراء مقدمين على استقاله..
-- على رأيك.. وهى يعنى مش كتر استقالات .. انا اجيب منييييين بس ؟!!..
****
..وزاره الثقافه
" الوفد الاجنبى وصل يا فندم"
هتف بها حسين مدير المكتب
"خليهم يدخلوا فورا"
استقبل الوزير اعضاء الوفد ، واخذ يستعرض معهم انجازات الوزاره خلال عشرين عاما قضها فى موضعة..
-- بس دا قليل قوى يا معاى الوزير .. انتم مش مهتمين بالثقافه؟
-- ما احنا عشان كده هناخد خطوه جباره على طريق التنميه الثقافيه..
-- ايه ياترى؟؟
-- هاقولك رغم انه سر.. انا.. مقدم على اسقاله..
-- استقاله؟ .. دى خطوه شجاعه قوى منك و اعتراف بالمسئوليه.
-- متشكر... انا طول عمرى شجاع.. مش كده يا حسين؟؟
( حسين):
-- هو فيه اشجع من سيادتك.
ئيس الوفد الاجنبى :
-- ومين يا ترى هايمسك الوزاره بعدك؟
-- انا برضه
-- ازاى بقى ؟ امال مقدم استقاله ليه؟!!
-- بقى يعنى لما اكون وزير حاف مسكها ، ولما اخذ استقاله اسيبها؟!
-- ما هى الاستقاله كده
-- ياسلام ومابقاش وزير؟؟؟
-- لا
-- ايه ده؟ يعنى العز و الهيلمان و المرسيدس و الحريم الحلوه و كشك الحراسه و كارنيه نادى الشمس.. كل ده هايروح؟؟
-- ايوه ، وتبقى مواطن عادى جدا
-- لا يا عم يفتح الله ، حسيين.. يا حسيييييييين
-- ايوه يا فندم..
-- شفت شورتك السوده ! ..هايسحبوا منى الوزاره..
-- ليه يا فندم .. هو انت كنت راكنها فى الممنوع
-- انت بتهزر يا حيوان ؟!! .. بكره الصبح تروح تسحب الطلب الزفت ده.
-- ما ينفعش ... لازم سيادتك اللى تروح تسحبه بنفسك
-- اروح! .. طبعا اروح.. قال يسبوا الوزاره قال.!!

..قصر حكومه انتيكا
وزير الثقافه يدخل على الحاكم :

-- يا صباح البهجه يا جناب الحاكم.
-- اهو صباح ..تعالى يا وش القرده.. بقى انت مقدم على ستقاله؟
-- يا جناب الحاكم دى غلطه مطبعيه.. انا قصدى اصطباحه.
-- ايوه كده .. قول حاجه نفهمها.. فين الاصطباحه دى؟؟

يخرج سيجاره ملغمه ، و يناولها للحاكم

-- صباح العطر يا أفندم
-- صباح التنفس.. دا صنف عالى قوى.. ابقى سيب منه بره عشان كله يتكيف.
يدخل وزير الداخليه فجأه:
-- صباح الخير يا افندم .. انا عايز استقاله
-- تعالى تعالى.. شد و احبس واتكيف
-- يا سلااام !... هى دى الاستقاله؟؟
-- اه هى دى ... عجبتك
--فله .. هى دى الاستقاله؟
-- ايوه يا سيدى..مبسوط؟؟..... ياللا ياض منك ليه كل واحد على وزارته.. مش اصطبحتوا؟.. شوفو شغلكوا
الوزيران فى نفس واحد
-- اوامرك يا جناب الحاكم.. مساء الخيييييييييييييييييييييييييييييير.

*****************************************************************************************************************